Tumanda dirina

Halak na tumanda dirina, ido naso olo manganhon na di balian ni hurumna.

Pesan: Orang yang tahu diri(keadaan) tak mau memakan makanan yang di luar dari kemampuannya.

Read More...

Gala-gala

Landit porhot,
Gota ni simargala-gala,
Hansit ngotngot,
Naung adong gabe so ada.

Lapatanna: Mansai hansit do hilalaon, molo naung mamora hian iba rupani, hape gabe pogos.

Read More...

Gala

Gala di gala bulu,
Panggalaan ni bonang,
Molo naeng monang maralohon musu,
Jolo talu ma maralohon dongan.

Lapatanna: Molo naeng taluhononhon musu, ingkon pataluon do roha maradophon angka dongan.

Read More...

Gadong

Nirimpu parhunihan,
Hape pargadongan,
Nirimpu parsaulian,
Hape hamagoan.

Lapatanna: Didok roha dapot uli manang laba ma iba, hape hasusaan dohot harugian do na ro.

Read More...

Gaja

Anggo gaja disior,
Marhara ma si alo,
Anggo raja partigor,
Parhata na so taralo.

Lapatanna: Ndang boi aloon halak na tigor marroha di angka pangkataion.

Read More...

Gaja

Pat ni gaja,
Tu pat ni hora,
Anak ni raja do hamu,
Anak ni na mora.

Lapatanna: Hata na mamuji, pasangaphon; na niangkupan mangkatai i nidok halak ni raja, jala na mora.

Read More...

Gadis

Na so tupa tu gadis halak,
Na adong tobus,
Na so tupa bunuon halak,
Na adong dangdang.

Lapatanna: Ndang boi hahuaon halak, anggo adong na boi bahenonna garar utangna.

Read More...

Andung ni sidoli

Andung ni sidoli tu siboruadi, nanihaholongan ni rohana:

Huandung ma dainang boru adui, na uli dainang do ito na malambok malilung i,
Parsimanghudap na magodang so maotik i,
Parsimalolong mangalap manaruhon i,
Dainang do ito parhuling-huling na bontar na gading i,
Na ias so usaon, na bontar so didion i,
Tarsura-sura ma ahu da ito di golap ni sihabornginan i,
Di papan na tumotap di rindang sibalunon i,
Na sumurai situriakta i da ba ito situriak si riburon i,
Di golap ni sihabornginan ninna simanghudap i,
Bosur so marpaiogon do simangarudokki,
Marningothon situriakta i da ba ito na manjojori sihabornginan i,
Ninna simanghudap lapa-lapa ni jolma i,
Tangihon dainang ma ahu da ito boru aduikku na pio-pio i alusi ahu na jou-jou i ,
(Ompu Tambok Pangaribuan, Ujungtanduk, 1990/ Ulikozok).

Read More...

Andung ni paragat

Andung ni Paragat marningot inong na:

Huandung ma dainang dainong, dainang i na lambok malilung i
Na so tupa jumungkar tu ahu lapa-lapa i, eii
Sungkup ni hinahansit dainong gok ni hinaparir i,
Sitaonon ni baoa di sinuantunasmu lapung mumbang i,
Nangkok sumuna-suna ahu inong tuat sumuntul-suntul i,
Mareakhon tonga ni lobangon na so marboli-boli i,
Mangalului sihumisik na tau paiogon i, ha eiei.
Huparsimalolonghon ma inong na matorop bulung i,
Marsiriaon siriburon di antaran na bidang i,
Boha ma baoa di dainong songon simarhuruk na marpuhung i,
Da songon siteuhon na manggompang di tonga ni adaran i ai.

Hansit na i inoong ahu lapa-lapa i,
Parir na iale inong sinuantunasmi, ha eieieii.
Marobur ho inong so huparsimalolonghon i,
Marlangit ni siadaoan ahu e tu langit na so habilangan i, ha eieieie.
Boha ma i pangintubum di ahu inong na mangintubu oooi,
Boha ma i parsinuanmu ba among among na marsinuan ooi,
Umbahen ahu ba inong talaga panduduran lubang-lubang panarean i,

Hansit na i inoong ahu lapa-lapa i,
Sungkup ni hinaparir gok ni hinadangol i,
Sitaonon ni baoa di ahu lapung mumbang i, ha eiei
Ba huandung ma dainang ba inoong dainang i na lambok malilung i,
Na lupa songon baoa di ahu lapa-lapa on,
Na so mangoloi siajaron ni na ahu lapung i ai, inoooong oi.

Hansit na iale inong ahu lapa-lapa i, ha eieiei,
Hubereng ma iale inoong na matorop bulung i,
Marsiriahon siriburon di antaran na bidang i,
Boha ma ahu ba inong tampuk ni simanjujung tarlompit simanginon i,
Ala ni sihumisik na soada i na ahu lapung i, ha ooi, oi
Ba asal mauja matoga ma inong da sisumbaonmi,
Sinuantunas na di jolo-jolongki,
Da dohot i sinuan beu i na ahu lapung i, ai,
Anggiat iale inong padirgak simanjujung mangembas simanginon i,
Mandapothon na torop bulung di antaran na bidang i, ieiei,

Hansit na i inoong ahu lapa-lapa i,
Parir na iale among ahu lapungki,
Na so sadia sihumisik na dohot paiogon i, ai,
Umbahen ahu dainooong martoba na ni udan iii,
Hansit na i inong ahu lapa-lapa i,
Na manaon na hansit dainong gok ni hinaparir i,
Sinuantunasmu baoa di ahu lapa-lapa i, ai, ooi, ooi,
Tu dia ma ahu dainoong ahu lapa-lapa i,
Mumbang tu dolok ahu ba inong mumbang tu toruan i,
Manarihon da na soada mareakhon sihumisik i, ai, oooi,ooooi,
(Ompu Hotma Sinurat, Lumban Julu. 1990/ Uli Kozok)

Read More...

Batu

Ndang tuktuhan batu,
Dakdahan simbora,
Ndang tuturan datu,
Ajaran na marroha.

Lapatanna: Ndang ajaran halak naung malo mangula-ulaonna.

Read More...