Andung ni paragat

Andung ni Paragat marningot inong na:

Huandung ma dainang dainong, dainang i na lambok malilung i
Na so tupa jumungkar tu ahu lapa-lapa i, eii
Sungkup ni hinahansit dainong gok ni hinaparir i,
Sitaonon ni baoa di sinuantunasmu lapung mumbang i,
Nangkok sumuna-suna ahu inong tuat sumuntul-suntul i,
Mareakhon tonga ni lobangon na so marboli-boli i,
Mangalului sihumisik na tau paiogon i, ha eiei.
Huparsimalolonghon ma inong na matorop bulung i,
Marsiriaon siriburon di antaran na bidang i,
Boha ma baoa di dainong songon simarhuruk na marpuhung i,
Da songon siteuhon na manggompang di tonga ni adaran i ai.

Hansit na i inoong ahu lapa-lapa i,
Parir na iale inong sinuantunasmi, ha eieieii.
Marobur ho inong so huparsimalolonghon i,
Marlangit ni siadaoan ahu e tu langit na so habilangan i, ha eieieie.
Boha ma i pangintubum di ahu inong na mangintubu oooi,
Boha ma i parsinuanmu ba among among na marsinuan ooi,
Umbahen ahu ba inong talaga panduduran lubang-lubang panarean i,

Hansit na i inoong ahu lapa-lapa i,
Sungkup ni hinaparir gok ni hinadangol i,
Sitaonon ni baoa di ahu lapung mumbang i, ha eiei
Ba huandung ma dainang ba inoong dainang i na lambok malilung i,
Na lupa songon baoa di ahu lapa-lapa on,
Na so mangoloi siajaron ni na ahu lapung i ai, inoooong oi.

Hansit na iale inong ahu lapa-lapa i, ha eieiei,
Hubereng ma iale inoong na matorop bulung i,
Marsiriahon siriburon di antaran na bidang i,
Boha ma ahu ba inong tampuk ni simanjujung tarlompit simanginon i,
Ala ni sihumisik na soada i na ahu lapung i, ha ooi, oi
Ba asal mauja matoga ma inong da sisumbaonmi,
Sinuantunas na di jolo-jolongki,
Da dohot i sinuan beu i na ahu lapung i, ai,
Anggiat iale inong padirgak simanjujung mangembas simanginon i,
Mandapothon na torop bulung di antaran na bidang i, ieiei,

Hansit na i inoong ahu lapa-lapa i,
Parir na iale among ahu lapungki,
Na so sadia sihumisik na dohot paiogon i, ai,
Umbahen ahu dainooong martoba na ni udan iii,
Hansit na i inong ahu lapa-lapa i,
Na manaon na hansit dainong gok ni hinaparir i,
Sinuantunasmu baoa di ahu lapa-lapa i, ai, ooi, ooi,
Tu dia ma ahu dainoong ahu lapa-lapa i,
Mumbang tu dolok ahu ba inong mumbang tu toruan i,
Manarihon da na soada mareakhon sihumisik i, ai, oooi,ooooi,
(Ompu Hotma Sinurat, Lumban Julu. 1990/ Uli Kozok)