Silangkua ni Pege

Narobi ni narobi adong ma sada huta margoar Dolok Maralit-alit. Pandaraman ni parhutaon marhauma do huhut tu tombak mangalului Gota, Damar, Hotang dohot angka na asing. Laklak ni hau do disorha mambahen bonang, ditonun ma gabe ulos na laho pangkeon ni pangisi ni luat i, ala ido dope na masa tingki i.

Ia hutaon ndang sadia dao sian tombak, adong do hasomalan parsobanan, parsungkitan ni angka naposo sian hutaon. Dung sidung marbabo, ulaon ni angka unan nang na marbaju, somal do laho tu tombak mangalului pandan. Diletek ma i mambahen lage dohot tandok.

Ia di hutaon adong ma sada na marbaju tung nauli do rupana si Langkua ni Pege do goarna. Alani hona ni parsisigatonna runsur lanok sian obukna, ala ni landitna marhilong-hilong songon habong jentur, ima diandungkon amani purbahollung. Jala uli ni hurumna ipe songon na hinombu-hombu, rungkung na songon pangaritipan tobu huhut dililiti singkoru2 dohot hinohopanna songon antajau namongkal, tu bitis patna songon dengke namangolu, domu tu pardalanna i songon limbat namangolu.

Tung sae do hinauli songon suru-suruan bidadari ma, hohar doli-doli huhut marsigulut pasahat tona mangido napuran tano-tano rangging marsiranggongan anggiat tondi marsigomgoman di roha ni doli2 na sai humoli-humoli. Dina sahali laho ma si Langkua ni pege dohot donganna namarbaju ni huta i tu tombak mangalului sungkit, gabe udur ma nasida 7(pitu) halak.

Dina mardalan i sahat ma nasida tu tombak, si udur-udur do nasida tu dolok tu toruan songon anak ni dengke di ambar na mardalan mambuati bulung sungkit dohon mambuat pandan on. Lam leleng lam dao ma masuk halak i tu tombak asa lam gumodang dapot sungkit on. Alai anggo si Langkua ni pege maos mammiliti do ibana, ai dibuat nasada dipalua na sada, ganup ditiop-dipatudos tu na sadanari, sai umuli do sian na tiniopna parjolo. Sai songon ima si Langkua ni pege marlojong tusan-tuson, gabe tarsirang ma ibana sian donganna sionom halak i.

Di tombak i sai songon na adong do ro tu rohana mandok asa sai tuson ho..tuson ho ro, hape naung tartait hosa ni ulok Saniang Naga do ibana tumopothon lubang ni ulok na sohaluluan jolma manisia. Dina guling ari marsijouon ma halakki, asa mulak nasida tu huta, hape naso panagaman di ida ma si Langkua ni pege ndang adong. Dipio ma gogo "Didia doho Langkua ni pege?. beta hita mulak nungnga botari. dialusi sahali "dison do ahu". tep, disoro ulok Saniang Naga ma ibana diboan ma tu liang na, martariak ma ibana: Tolong, tolong ninna. Disi dibege sionom halak i, dilojongi ma naeng mangalului, hape lam dao soara ni si Langkua ni pege on. Ai nungnga sahat be halakki tu liang ni ulok i, dungi marsak ma sionom halak i jala tumatangis. Hatop ma mulak nasida paboahon barita i tu huta tu ama-ina ni si Langkua ni pege.

Disi dipatorang na marbaju i namasa i, marsak situtu do natoras ni si Langkua ni pege on, dungi dijou ma pargondang asa dipalu gondang marsomba tu sombaon na di tombak i asa dipalua sombaon i boruna na tinangkupna i, alai luhutna dang marlapatan usaha ni halak i.

Leleng ni parlelengan ia si langkua ni pege dipiara ulok ido ibana bahen donganna ndang dipalua sian liang i. Ditarui ulok i do sipanganonna, dia na lomo ni rohana dilehon do. Leleng di parlelengan sabam ma rohana disi ndang diingot be soroni arina na pinarmudu ni ulok naga i ibana. Naso pangkiriman nunga haduk anggo dipardangingon ni si Langkua ni pege, ai ndang sadia lelangnai gok ma di arina, topakma ulok sian ibana, pitu ulok sahali tubu ditubuhon ibana.

Disi di ida si Langkua ni pege songon i tubuna, mangandung ma ibana mangopas soharu tu talaga, soharu tu halanghulu, huhut ma diandunghon sambor ni nipingki..Oee bagian lampiang di simangarudok lapung i, ai pitu-pitu sahali tubu ulok lapa-lapa sian butuha jea on, jadi roma hata ni ulok i: "O ale boru ni rajanami, parsaulian do i diho, unang marsak roham unang burai dirim. Ida anakmi pitu sahali tubu, nda nunga martua jala sumurung ho sian donganmu jolma? Patur-ture ma inang unang mandele ho", ninna huhut dililiti ulok i si Langkua ni pege paboa lasniroha na.

Pitu taon pitu bulan ma si Langkua ni pege di liang inganan ni ulok i, tarsingot ma ibana tu ama-ina na, asa naeng paebatonna tubuna itu huta ni natorasna i di Dolok Maralit-alit. Jadi dipangido ma tu ulok i: "O ale ulok amani dakdanakon, pitu-pitu anakmon sian au nda tama paebatonku tu damang? Beta ma hita laho sonang do rohangku mardongan ho, pos ma roham asal ma laho hita tu huta ni damang. Hupaboa pe tu damang, hodo sapartinaonku arian nang borngin", ninna si Langkua ni pege tu ulok i.

Singkat serita, dipasingkop ma balanjona di dalan laho manopot hu huta ni amana di Dolok Marali-alit, dungi borhat ma nasida sisia halak i mardalan tu huta . Nang sian nadao nungnga dibereng parhuta i ma halak i, masipaboahan ma parhuta i: "Nunga mulak si Langkua ni pege, Oee nungnga mulak ibana", disi sahat di harbangan ni huta i. Di ida ma tutu nunga ro rap dohot ulok i, tarsonggot ma natoras na mandapothon ibana. Unang mabiar hamu marnida ulok on, ulok sipartogi do i ndang siboan jea i parsaulian do binoan ni di hitaon, ninna si langkua ni pege.

Dihaol ma boruna jala di ummai alani siholna dung leleng ndang dibereng. Dungi rap ma nasida laho tu huta udur dohot ulok i, ia ulok i pulik do dibahen inganan na ndang domu dohot juara natorop naro mamereng si Langkua ni pege i. Dung manang adong piga ari halak i di huta i, laho ma si Langkua ni pege tu batang aek namamolus sian toru ni huta i, naeng maranggir marningot hasomalanna di tingki haposoonna laho patiar-tiar obukna namarhilong-hilong i.

Alai anggo Ulok Saniang Naga nabolon i dohot anakna napitu i laho do tong tu batak aek maridi, di tingki na marlangei ulok i mansai godang do jolma mamereng sian nadao, leleng do antong maridi ulok i. Hape longkang ma sisik ni ulok i sian daging na, jala ulok i pe mangililu ma gabe jolma manisia. Alai anggo sisikna i gabe mas dohot perak marmaupan di batang aek i, lopus sahat tu paridianni si Langkua ni pege, dipapungu ma mas & perak i, jala diboan ma tu jabu. Longang ma halak sude marnida naung gabe jolma ulok i, mulak ma nasida tu bagas rap dohot si Langkua ni pege, dungi marpesta ma halak i, digokkon ma saluhut parhuta i manghalashon basa-basa ni marhuaso siboan tua i, di nasida.

Dung i sonang ma si Langkua ni pege diparsaripeonna jala mamompari ma selamat panjang umur sahat tu nasarimatua ndang hurang manang aha ibana. Songon ima turi-turian ni si Langkua ni pege "Simanuk-manuk jala sibontar andora, ndada sitodo turpuk siahut lomo ni roha, bagian do sijaloon”. (Diceritakan oleh: B.K.Marpaung, 1954).